ភ្នំពេញ៖ រដ្ឋមន្ត្រីក្រសួងការបរទេសជប៉ុន និងរដ្ឋមន្ត្រីក្រសួងបរទេសកម្ពុជានាថ្ងៃទី២៤ ខែកុម្ភៈ ឆ្នាំ២០២៣ នឹងចុះហត្ថលេខាលើលិខិតប្តូរសារស្តីពីការផ្តល់ហិរញ្ញប្បទានឥតសំណងរបស់ជប៉ុន ចំនួន ៣ ៩៨៦លានយ៉េន ស្មើនឹង ៣០,៦លានដុល្លារអាមេរិក ដើម្បីអនុវត្ត «គម្រោងពង្រីកប្រព័ន្ធផ្គត់ផ្គង់ទឹកស្អាតនៅខេត្តស្វាយរៀង» នៅទីស្ដីការក្រសួង។

បើតាមសេចក្តីប្រកាសព័ត៌មានរបស់ក្រសួងការបរទេសកម្ពុជា លិខិតប្ដូរសារខាងលើ គឺជាការធ្វើវិសោធនកម្មទៅលើចំនួនទឹកប្រាក់ដែលបានចែងនៅក្នុងលិខិតប្ដូរសារដែលបានចុះហត្ថលេខារួច នៅថ្ងៃទី០២ ខែមីនា ឆ្នាំ២០២២។

ក្រសួងការបរទេស ចាត់ទុកជំនួយឥតសំណងរបស់ជប៉ុនផ្តល់ឱ្យកម្ពុជា នឹងរួមចំណែកយ៉ាងសំខាន់ដល់កិច្ចខិតខំប្រឹងប្រែងអភិវឌ្ឍន៍សេដ្ឋកិច្ច-សង្គមជាបន្តបន្ទាប់របស់រាជរដ្ឋាភិបាលកម្ពុជា ព្រមទាំងធ្វើឱ្យកាន់តែស៊ីជម្រៅ បន្ថែមទៀតនូវទំនាក់ទំនងដ៏ល្អប្រសើរដែលមានស្រាប់ និងកិច្ចសហប្រតិបត្តិការកំពុងលូតលាស់ លើគ្រប់វិស័យរវាងប្រទេសទាំងពីរ ខណៈឆ្នាំនេះប្រទេសទាំងពីរកំពុងប្រារព្ធខួបអនុស្សាវរីយ៍លើកទី៧ នៃការបង្កើតទំនាក់ទំនងការទូត៕